الشروط والخصوصية

عن Mama2Mama

Mama2Mama منصة مجانية تربط الأمهات ببعض: أم عندها أغراض أطفال ما تحتاجها تعرضها، وأم ثانية تحتاجها تطلبها وتستلمها منها مباشرة. المنصة ما تبيع شي، وما تاخذ أي مبلغ، وما يُسمح بالبيع أو طلب مقابل مادي من خلالها.

الحساب

• لازم يكون عمرك 18 سنة أو أكثر عشان تستخدمين المنصة.
• تدخلين برابط يوصل على إيميلك، وإنتِ مسؤولة عن حماية إيميلك وعن أي شي ينضاف من حسابك.
• اكتبي معلومات صحيحة: اسم يظهر للأمهات، ورقم جوال صحيح للتنسيق.

الأغراض المسموحة

• أغراض أطفال نظيفة وصالحة للاستخدام: ملابس، كراسي وعربيات، رضاعات وأدوات تغذية، ألعاب، أجهزة، وغيرها.
• حليب الأطفال نقبله بس إذا كانت العلبة مقفلة وما انفتحت، وتاريخ انتهائها بعد شهر على الأقل.
• صوري الغرض صورة حقيقية واكتبي حالته بصدق.

الأغراض الممنوعة

• الأدوية والفيتامينات والمكملات.
• حليب مفتوح، أو منتهي، أو تاريخه أقل من شهر، أو حليب محضّر في البيت أو حليب أم.
• كراسي سيارة تعرضت لحادث، أو تالفة، أو منتهية الصلاحية حسب الشركة المصنعة.
• أي منتج سحبته الشركة أو الجهات الرسمية من السوق، أو مخالف للأنظمة في المملكة.
• أي غرض معروض للبيع أو بمقابل.

الطلب والاستلام

• كل أم تقدر يكون عندها 3 طلبات مفتوحة بنفس الوقت، عشان توصل الأغراض لأكبر عدد من الأمهات.
• لما تطلبين غرض، يظهر لك رقم صاحبة الغرض ومكان الاستلام، وتتفقون بينكم على الوقت.
• الاستلام والتسليم يصير مباشرة بين الأمهات، والمنصة ما توصّل ولا تستلم أي غرض.
• لسلامتك: استلمي في مكان عام أو عند مدخل المبنى، ووقت النهار إذا تقدرين، ولا تشاركين معلومات شخصية زيادة عن اللازم.

المسؤولية

• Mama2Mama وسيط فقط. المنصة ما تفحص الأغراض ولا تضمن حالتها أو سلامتها أو مطابقتها للوصف.
• اللي تستلم الغرض مسؤولة إنها تتأكد منه بنفسها قبل الاستخدام، خصوصاً الحليب (القفل والتاريخ) وكراسي السيارة.
• المنصة غير مسؤولة عن أي ضرر أو خلاف ينتج عن غرض أو عن لقاء بين المستخدمات.

مخالفة الشروط

نقدر نحذف أي غرض أو نوقف أي حساب يخالف هذي الشروط، أو يسيء للأمهات، أو يستخدم المنصة للبيع أو الإزعاج.

وش البيانات اللي نحفظها

• إيميلك: عشان تسجيل الدخول بس.
• بيانات الغرض: الاسم والصورة والوصف والعمر المناسب والمدينة والحي ووقت ومكان الاستلام والملاحظات. هذي تظهر لأي أحد يزور الموقع.
• اسمك اللي يظهر للأمهات، مثل «أم سارة»، ويظهر مع أغراضك.
• رقم جوالك ورابط موقعك على الخريطة: هذي بيانات خاصة.
• بيانات الطلب: الاسم ورقم الجوال والرسالة اللي تكتبينها لما تطلبين غرض.

مين يشوف بياناتك الخاصة

• رقم جوال صاحبة الغرض ورابط موقعها ما يظهر إلا لها وللأم اللي طلبت الغرض فعلاً.
• اسم ورقم اللي طلبت الغرض ما يظهر إلا لها ولصاحبة الغرض.
• الحماية مطبقة في قاعدة البيانات نفسها، مو بس في الشاشة.

وين تنحفظ البيانات

البيانات والصور تنحفظ عند خدمة Supabase، والموقع مستضاف على Vercel. ما نبيع بياناتك ولا نشاركها مع أي جهة للإعلانات، وما نستخدم أدوات تتبع إعلانية.

التحكم في بياناتك

• تقدرين تعدلين أو تحذفين أي غرض أضفتيه في أي وقت من صفحة «أغراضي وطلباتي».
• تقدرين تطلبين حذف حسابك وكل بياناتك بالتواصل معنا على الإيميل اللي تحت.

الأنظمة

نلتزم بحماية بياناتك حسب نظام حماية البيانات الشخصية في المملكة العربية السعودية، ونجمع أقل قدر من البيانات نحتاجه عشان المنصة تشتغل.